കോതമംഗലം: മാർ അത്തനേഷ്യസ് കോളേജ് അസോസിയേഷന്റെ സപ്തതി ആഘോഷങ്ങളുടെ ഔപചാരിക ഉദ്ഘാടനം 28-ന് നടക്കും.ബസേലിയോസ് പൗലോസ് ഇൻഡോർ സ്റ്റേഡിയത്തിൽ സെപ്തംബർ 28-ന് വൈകിട്ട് 4 ന് ഐഎസ്.ആർഒ ചെയർമാൻ ഡോ. എസ് സോമനാഥ് ആഘോഷ പരിപാടികൾ ഉൽഘാടനം ചെയ്യും.

ഇടുക്കി എം.പി. അഡ്വ. ഡീൻ കുര്യാക്കോസ്, അദ്ധ്യക്ഷത വഹിക്കുന്ന ചടങ്ങിൽ, കോതമംഗലം എം.എൽ.എ. ആന്റണി ജോണും, പ്രമുഖ വ്യക്തിത്വങ്ങളും സംബന്ധിയ്ക്കും.

സപ്തതി ആഘോഷത്തോടനുബന്ധിച്ച്, ശാസ്ത്ര സാങ്കേതിക വിജ്ഞാനങ്ങളും, കൗതുകവും ഒന്നിക്കുന്ന നിരവധി പരിപാടികളാണ് മാർ അത്തനേഷ്യസ് സ്ഥാപനങ്ങളായ മാർ അത്തനേഷ്യസ് കോളേജ് (ഓട്ടോണമസ്), മാർ അത്തനേഷ്യസ് കോളേജ് ഓഫ് എൻജിനീയറിംഗ്, (ഓട്ടോണമസ്) എന്നീ സ്ഥാപനങ്ങളുടെ മേൽനോട്ടത്തിൽ സംഘടിപ്പിച്ചിട്ടുള്ളത്.

മാർ അത്തനേഷ്യസ് സ്ഥാപനങ്ങളുടെ അക്കാദമിക പാരമ്പര്യങ്ങളും,നേട്ടങ്ങളും വെളിപ്പെടുത്തുന്ന വിവിധ പരിപാടകളിലൂടെ എഴുപതാം വാർഷികാഘോഷങ്ങളുടെ പ്രൗഢി വർദ്ധിപ്പിക്കുകയാണ് മാർ അത്തനേഷ്യസ് കലാലയങ്ങൾ.

ഇതിനായി, ”സപ്ത 24” എന്ന പേരിൽ 2024 സെപ്തംബർ 26 മുതൽ 28 വരെ അഖില കേരള ഇന്റർസ്‌കൂൾ ശാസ്ത്ര സാങ്കേതിക മത്സരങ്ങളും പ്രദർശനങ്ങളും സംഘടിപ്പിച്ചിട്ടുണ്ട്.

ഇതിൽ കേരളത്തിലെ 10, 11, 12 ഗ്രേഡുകളിലെ സ്‌കൂൾ വിദ്യാർത്ഥികൾക്കായി സയൻസ് ക്വിസ്, മാത്തമാറ്റിക്സ് ക്വിസ്, ആനിമേഷൻ, വെബ് ഡിസൈൻ, സ്റ്റിൽ മോഡൽ, വർക്കിംഗ് മോഡൽ, ഐഡിയത്തോൺ തുടങ്ങിയ മത്സര വിജയികൾക്ക് ഒന്നര ലക്ഷത്തിൽ അധികം രൂപയുടെ സമ്മാനങ്ങളും ക്രമീകരിച്ചിട്ടുണ്ട്.

ഐ.എസ്.ആർ.ഒ, കൊച്ചിൻ ഷിപ്പ്‌യാർഡ്, ഫയർ ഫോഴ്‌സ്, കേരള പോലീസ്, മെഡിക്കൽ കോളേയ്ജ്, ബി.എസ്.എൻ.എൽ, നേര്യമംഗലം ഫാം, കൃഷി വിജ്ഞാന കേന്ദ്രം തുടങ്ങി പ്രമുഖ സ്ഥാപനങ്ങളുടേതടക്കം എഴുപതിൽ പരം സ്റ്റാളുകൾ ഉൾപ്പെടുന്ന ശാസ്ത്ര സാങ്കേതിക പ്രദർശനവും ഒരുക്കിയിട്ടുണ്ട്.

കൂടാതെ മാർ അത്തനേഷ്യസ് കോളേയ്ജ്, മാർ അത്തനേഷ്യസ് കോളേയ്ജ് ഓഫ് എൻജിനീയറിംഗ് എന്നിവ സന്ദർശിക്കാനുള്ള അവസരവും ഒരുക്കിയിട്ടുണ്ട്.

സപ്ത 24, എന്ന പേരിൽ 3 ദിവസം നീണ്ട് നിൽക്കുന്ന ശാസ്ത്ര സാങ്കേതിക മത്സര പ്രദർശനങ്ങളുടെ ഉത്ഘാടനം സെപ്തംബർ 26 ന് ബസേലിയോസ് പൗലോസ് ഇൻഡോർ സ്റ്റേഡിയത്തിൽ കേരള സ്റ്റാർട്ടപ്പ് മിഷൻ സിഇഒ അനൂപ് അംബിക ഉദ്ഘാടനം ചെയ്യും.

സപ്ത 24-ന് പുറമെ സയൻഷ്യ-’24 എന്ന പേരിൽ ഹയർസെക്കൻഡറി വിദ്യാർത്ഥികൾക്കുള്ള 4 ദിവസത്തെ സയൻസ് ഇന്റേൺഷിപ്പ് പ്രോഗ്രാമിന് (സെപ്തംബർ 25 മുതൽ 28 വരെ) മാർ അത്തനേഷ്യസ് കോളേജ് (ഓട്ടോണമസ്) ആതിഥേയത്വം വഹിക്കും.

കൂടാതെ, മാർ അത്തനേഷ്യസ് കോളേജ് ഓഫ് എൻജിനീയറിംഗ് (ഓട്ടോണമസ്) രാജ്യത്തുടനീളമുള്ള യുവ എൻജിനീയറിംഗ് വിദ്യാർത്ഥികൾക്ക് അവരുടെ സാങ്കേതിക കഴിവുകളും നൂതന ആശയങ്ങളും പ്രദർശിപ്പിക്കുന്നതിന് വേദിയൊരുക്കുന്ന ദേശീയ തലത്തിലുള്ള ഇന്റർകോളീജിയറ്റ് ടെക്‌നിക്കൽ ഫെസ്റ്റായ തക്ഷക് ’24 (സെപ്തംബർ 26 മുതൽ 28 വരെ) നടക്കും.

സപ്തതി ആഘോഷങ്ങളുടെ ഭാഗമായി സ്‌കൂൾ കോളേയ്ജ് വിദ്യാർത്ഥികൾക്കുള്ള കലാമത്സരങ്ങളും സിനിമ, കലാ മേഖലകളിലെ പ്രശസ്തർ പങ്കെടുത്ത ദൃശ്യ വിസ്മയങ്ങളും ഒരുക്കിയിട്ടുണ്ട്.

കോതമംഗലം പ്രദേശത്തെ ജനതയെ വിദ്യാഭ്യാസപരമായി ഉന്നതിയിൽ എത്തിക്കുക എന്ന ലക്ഷ്യത്തോടെ സാമ്പത്തികശാസ്ത്രപണ്ഡിതനും സാമൂഹീക പരിഷ്‌കർത്താവുമായ പ്രൊഫ. എം.പി. വർഗീസിന്റെ നേതൃത്വത്തിൽ 1953 ഒക്ടോബർ 21 ന് രൂപീകരിച്ച മാർ അത്തനേഷ്യസ് കോളേജ് അസ്സോസിയേഷൻ സപ്തതിയുടെ നിറവിൽ എത്തി നിൽക്കുമ്പോൾ, അസ്സോസിയേഷന് കീഴിലുള്ള സ്ഥാപനങ്ങൾ കോതമംഗലത്തിന് മാത്രമല്ല, ലോകത്തിന് തന്നെ അഭിമാനകരമായ നേട്ടങ്ങൾ സമ്മാനിച്ച പ്രതിഭകളെ വാർത്തെടുത്തുകൊണ്ട് ഇന്ത്യയുടെ വിദ്യാഭ്യാസ നഭസ്സിൽ ജൈത്രയാത്ര തുടരുന്നു.

1955 ജൂലൈ 14 ന് പ്രവർത്തനം ആരംഭിച്ച മാർ അത്തനേഷ്യസ് കോളേജ് 1956 ഒക്ടോബർ 30ന് എത്യോപ്യൻ ചക്രവർത്തി ആയിരുന്ന ഹെയ്‌ലി സെലാസിയാണ് ഉദ്ഘാടനം ചെയ്തത്. യു.ജി.സി.യുടെ സ്വയം ഭരണ പദവിയും നാക് അക്രഡിറ്റേഷനിൽ എ പ്ലസ് ഗ്രേഡുമുള്ള കോളേജ്
കേന്ദ്ര വിദ്യാഭ്യാസ മന്ത്രാലയത്തിന്റെ വിദ്യാഭ്യാസ റാങ്കിംഗിൽ (നാഷണൽ ഇൻസ്റ്റിറ്റിയൂഷണൽ റാങ്കിംഗ് ഫ്രെയിം വർക്ക്-എൻ.ഐ.ആർ.എഫ്.) തുടർച്ചയായി നാലാം വർഷവും 100ൽ താഴെ റാങ്കിങ്ങിൽ തുടരുന്നു.

1961ൽ കോതമംഗലത്ത് സ്ഥാപിതമായ മാർ അത്തനേഷ്യസ് കോളേജ് ഓഫ് എൻജിനിയറിംഗ് ക്രിസ്ത്യൻ മാനേജ്‌മെന്റിന്റെ കീഴിൽ തുടങ്ങിയ ഏഷ്യയിലെ തന്നെ ആദ്യ എൻജിനിയറിംഗ് കോളേയ്ജാണ് യു.ജി.സി.യുടെ സ്വയം ഭരണ പദവിയും നാക് അക്രഡിറ്റേഷനിൽ എ പ്ലസ് ഗ്രേഡുമുള്ള കോളേയ്ജ് കേരളത്തിലെ മികച്ച ആദ്യ 5 എൻജിനീയറിംഗ് കോളേയ്ജുകളിൽ ഒന്നാണ്.

1965 ൽ അത്തനേഷ്യസ് ആരംഭിച്ച കോളേജ് ഹൈസ്‌കൂൾ, 2008 ൽ മാർ അത്തനേഷ്യസ് ഇന്റർ നാഷണൽ സ്‌കൂൾ ആയി ഉയർത്തി തുടർച്ചയായി 10,12 ക്ലാസ്സുകളിൽ 100 ശതമാനം വിജയം പുലർത്തി വരുന്നു.

മലയോര മേഖലയിലെ വിദ്യാർത്ഥികൾക്കായി ഉന്നത വിദ്യാഭ്യാസ സാധ്യതകൾ തുറന്നു കൊടുത്തുകൊണ്ട് 2003 ൽ അടിമാലിയിൽ മാർ ബസേലിയോസ് കോളേജ് നിലവിൽ വന്നു.

കലാകായികരംഗത്തും, ശാസ്ത്രസാഹിത്യസാങ്കേതിക രംഗങ്ങളിലും, അക്കാദമിക രംഗത്തും, അതുല്യപ്രതിഭകളെ സമ്മാനിച്ച മാർ അത്തനേഷ്യസ് സ്ഥാപനങ്ങൾ പിന്നിട്ട വഴികളിൽ നേട്ടത്തിന്റെ നാഴികക്കല്ലുകൾ നിരവധിയുണ്ട്.

എം എ കോളേജ് അസോസിയേഷൻ വൈസ് ചെയർമാൻ, എ ജി ജോർജ്, മാർ അത്തനേഷ്യസ് കോളേയ്ജ് ഓഫ് എൻജിനീയറിംഗ് പ്രിൻസിപ്പൽ ഡോ. ബോസ് മാത്യു ജോസ്, മാർ അത്തനേഷ്യസ് കോളേയ്ജ് പ്രിൻസിപ്പൽ ഡോ. മൻജു കുര്യൻ, മാർ ബസേലിയോസ് കോളേയ്ജ് പ്രിൻസിപ്പൽ ഡോ. ബെന്നി അലക്‌സാണ്ടർ, കെ കെ ദാനി, (ശാസ്ത്ര പ്രദർശന കമ്മിറ്റി ചെയർമാൻ) കെ. പി. ബാബു (പബ്ലിസിറ്റി കമ്മിറ്റി ചെയർമാൻ)ഡോ. സോണി കുര്യാക്കോസ് (ശാസ്ത്ര പ്രദർശന കമ്മിറ്റി കൺവീനർ ), പ്രൊഫ. ബൈബിൻ പോൾ, (പബ്ലിസിറ്റി കമ്മിറ്റി കൺവീനർ)എന്നിവർ പത്രസമ്മേളനത്തിൽ പങ്കെടുത്തു.