കോതമംഗലം: കോതമംഗലം മാർ അത്തനേഷ്യസ് കോളേജ് അസോസിയേഷന്റെ സപ്തതി ആഘോഷങ്ങളുടെ ഭാഗമായി നടക്കുന്ന ശാസ്ത്ര സാങ്കേതിക പ്രദർശനങ്ങൾ ശ്രദ്ധേയം.പ്രദർശനത്തിൽ വിവിധ സർക്കാർ പൊതു മേഖലാ സംരംഭങ്ങളുടേത് അടക്കം എഴുപത്തിൽ പരം സ്റ്റാളുകൾ പങ്കാളികളായിട്ടുണ്ട്.

വിജ്ഞാനവും വിസ്മയവും കൗതകവും കോർത്തിണക്കിയ പ്രദർശനം കാണാൻ വിദ്യാർത്ഥികൾ അടക്കം നാടിൻ്റെ നാനാഭാഗത്തു നിന്നായി ജനക്കൂട്ടം എത്തുന്നുണ്ട്.ചൂരമല ഉരുൾപൊട്ടലിന്റെ മുൻപും ഇപ്പോഴും ഉള്ള മാതൃക, ഗ്രേറ്റർ ലണ്ടനിലെ ഭൂരിഭാഗം വെള്ളപ്പൊക്ക പ്രദേശങ്ങളെയും സംരക്ഷിക്കുന്നതിനായി നിർമ്മിച്ച തേംസ് ബാരിയറിന്റെ മാതൃക, ജാതിക്കായുടെ തൊണ്ടു കളയുന്ന യന്ത്രം,അജൈവ മാലിന്യങ്ങളിൽ നിന്നുള്ള വൈദ്യുതി ഉൽപ്പാദനം, മനുഷ്യൻ്റെ ചലനം കണ്ടെത്തുകയും തടസ്സങ്ങൾ ഒഴിവാക്കി മനുഷ്യനെ പിന്തുടരുകയും ചെയ്യുന്ന ഹ്യൂമൻ ഫോളോവിംഗ് റോബോട്ട്, വിവിധ ഉത്പാദന മേഖലകളിലെ ജീവനക്കാരുടെ ജോലിഭാരം കുറയ്ക്കാനും, പ്രയോജനകരമായ റോബോട്ടിക് ആം,ഡ്രോൺ റേസേഴ്‌സ് കേരളയും ഫ്യൂസ്‌ലേജ് ഇന്നൊവേഷനും ചേർന്നുള്ള അത്യാധുനിക ഡ്രോൺ സാങ്കേതിക വിദ്യകളുടെ പ്രദർശനം,ഓഗ് മെൻ്റഡ് റിയാലിറ്റി സാൻഡ്‌ബോക്‌സ്,സൊസൈറ്റി ഓഫ് ഓട്ടോമോട്ടീവ് എഞ്ചിനീർസ് എം.എ എഞ്ചിനീയറിംഗ് കോളേജ് ഘടകം നിർമ്മിച്ച വിവിധ വാഹനങ്ങൾ തുടങ്ങി നിരവധി പ്രദർശന ഇനങ്ങൾ എഞ്ചിനീയറിംഗ് കോളേജിൽ ഒരുക്കിയിട്ടുണ്ട്.

മാർ അത്തനേഷ്യസ് കോളേജ് ക്യാമ്പസിൽ സംഘടിപ്പിച്ചിരിക്കുന്ന പ്രദർശന വേദികൾ വിദ്യാർത്ഥികളിൽ കൗതുകം നിറയ്ക്കുന്നു. കാർഷിക വികസന കർഷക ക്ഷേമ വകുപ്പ് സ്റ്റാളിൽ വിവിധ ഫലവൃക്ഷ തൈകൾ വില്പനയ്ക്ക് ഒരുക്കിയിട്ടുണ്ട്.ഐ.സി.എ.ആർ കെ.വി.കെ സ്റ്റാളിൽ ഡ്രോൺ ഉപയോഗിച്ചുളള കൃഷിരീതികൾ പരിചയപ്പെടുത്തുന്നു.
കേരള ഖാദി ആൻ്റ് വില്ലേജ് ഇൻഡസ്ട്രീസ് ബോർഡ്, തേൻ ഉല്പന്നങ്ങളുടെ പ്രദർശനവും വില്പനയും നടത്തുന്നു. അൽ – അസർ മെഡിക്കൽ കോളേജ് അനാട്ടമി, എംബ്രിയോളജി, ഫിസിയോളജി, ഫോറൻസിക് എന്നീ വിഭാഗങ്ങളുടെ പ്രദർശനം ഒരുക്കിയിട്ടുണ്ട്.

ബോട്ടണി വിഭാഗത്തിൻ്റെ പ്രദർശന സ്റ്റാളുകളിൽ വിവിധ തരം ചെടികളുടെ പ്രദർശനവും ചെറുധാന്യങ്ങളുടെ വില്പന എന്നിവയും ഒരുക്കിയിട്ടുണ്ട്. കെമിസ്ട്രി വിഭാഗത്തിൻ്റെ സ്റ്റാളുകളിൽ ഐസ് ബോംബ്, കെമിക്കൽ വോൾക്കാനോ എന്നിങ്ങനെ ആകാംക്ഷാജനകവും വ്യത്യസ്തവുമായ പരീക്ഷണങ്ങളാണ് വിദ്യാർഥികൾക്കായി ഒരുക്കിയിരിക്കുന്നത്. ഫിസിക്സ് , സുവോളജി, എന്നീ വിഭാഗങ്ങളുടെ സ്റ്റാളുകളും ഏറെ ശ്രദ്ധ പിടിച്ചു പറ്റുന്നു.
ഹിസ്റ്ററി വിഭാഗം നടത്തുന്ന പ്രദർശനത്തിൻ്റെ ഭാഗമായി മുഗൾ ഭരണകാലത്തെ അറബി, ഉറുദു കയ്യെഴുത്ത് പ്രതികൾ,ചെപ്പേടുകൾ, താളിയോല ഗ്രന്ഥങ്ങൾ സ്റ്റാമ്പുകൾ, നാണയ ശേഖരം, ഉൾപ്പടെ വിപുല ശേഖരം ഉൾപ്പെടുത്തിയിട്ടുണ്ട്. കൂടാതെ മൺപാത്ര നിർമ്മാണം നേരിൽ കാണാനും പരിശീലിക്കാനും അവസരം ഒരുക്കുന്നു.

സപ്ത പ്രദർശന നഗരിയെ ആവേശത്തിൽ ആറാടിച്ച് കേരള പൊലീസിന്റെ കൊച്ചി,കളമശ്ശേരി കെ 9 ഡോഗ് സ്ക്വാഡിലെ നായ്ക്കളുടെ അഭ്യാസ പ്രകടനവും നടന്നു. മണം പിടിച്ച് കുറ്റവാളികളെയും, സ്ഫോടക വസ്തുക്കളുമെല്ലാം കണ്ടെത്തുന്ന നായ്ക്കളെ നേരിട്ട് കാണാനും അഭ്യാസ പ്രകടനം ആസ്വദിക്കാനും നൂറുകണക്കിന് പേരാണ് പ്രദർശന നഗരിയിൽ ഒത്തു ചേർന്നത്.

നാളെ രാവിലെ 10 മുതൽ വൈകിട്ട് 3 വരെ നടക്കുന്ന മുന്തിയ ഇനം വിദേശ നിർമിത കാറുകളും, ഇരുചക്ര വാഹനങ്ങളും ഉൾപ്പെടുത്തിയുള്ള ടെലെ 2024 ഉം രാവിലെ 11 ന് അഗ്നിശമന സേന നടത്തുന്ന അഭ്യാസപ്രകടനങ്ങളും നടക്കും .