കോതമംഗലം: മേഖലയിൽ കോൺഗ്രസിൽ പടപ്പിണക്കങ്ങൾ സജീവമായോ.കഴിഞ്ഞ ദിവസങ്ങളിൽ ഉണ്ടായ സംഭവങ്ങളാണ് ഇത്തരത്തിൽ ഒരു ചർച്ച സജീവമാവാൻ കാരണം.

കഴിഞ്ഞ ദിവസം കുട്ടംമ്പുഴ പഞ്ചായത്തംഗം കെ എ സിബിയെ ഡിസിസി പ്രസിഡന്റ് പാർട്ടി അംഗത്വത്തിൽ നിന്നും പുറത്താക്കിയിരുന്നു.സിബി പ്രസിഡന്റായിരുന്ന കുട്ടംമ്പുഴ റൂറൽ സഹകരണ ബാങ്കിൽ നടന്ന ക്രമക്കേടുകൾ പാർട്ടിക്ക് പൊതുസമൂഹത്തിൽ അവമതിപ്പ് സൃഷ്ടിച്ചു എന്ന കണ്ടെത്തലിന്റെ അടിസ്ഥാനത്തിലാണ് സിബിയെ പുറത്താക്കുന്നത് എന്ന്  ഇതുസംബന്ധിച്ചുള്ള അറയിപ്പിൽ ഡിസിസി പ്രസിഡന്റ് വ്യക്തമാക്കിയിട്ടുണ്ട്.

കുട്ടംമ്പുഴ പഞ്ചായത്തിൽ യൂഡിഎഫിനെ ഭരണത്തിലെത്തിയ്ക്കാൻ പ്രവർത്തിച്ച മേഖലയിലെ പ്രധാന പാർട്ടി പ്രവർത്തകരിൽ ഒരാളാണ് സിബി.പാർട്ടിയിലെ തന്നെ എതിർ ചേരിയിലെ ചിലരുടെ രഹസ്യനീക്കത്തെത്തുടർന്നാണ് സിബിയെ ഡിസിസി പ്രസിഡന്റ് പുറത്താക്കിയത് എന്ന തരത്തിൽ ഇപ്പോൾ പ്രചാരണം ശക്തിപ്പെട്ടിട്ടുണ്ട്.

ഇതുസംബന്ധിച്ചുള്ള വാദപ്രതിവാദങ്ങൾ കെട്ടങ്ങുംമുമ്പെയാണ് കിഴക്കൻ മേഖലയിലെ പാർട്ടിയിലെ വനിത പഞ്ചായത്തംഗം തനിയ്‌ക്കൊപ്പം ജയിച്ചുവന്ന പുരുഷ പഞ്ചായത്തംഗത്തിനും പാർട്ടിയിലെ മുൻ ബ്ലോക്ക് പ്രസിഡന്റിനുമെതിരെ ഗുരുതര ആരോപണങ്ങൾ ഉയർത്തി രംഗത്തെത്തിയത്.

പഞ്ചായത്തംഗവും പാർട്ടി നേതാവും ലൈംഗീകച്ചുവയോടെ തന്നോട് സംസാരിച്ചു,കൂടെ ചെല്ലാൻ ആവശ്യപ്പെട്ടു,ഭീഷിണിപ്പെടുത്തി,പൊതുസമൂഹത്തിൽ മോശക്കാരിയായി ചിത്രീകരിച്ച് പ്രചാരണം നടത്തി എന്നിവയായിരുന്നു വനിത പഞ്ചായത്തംഗത്തിന്റെ പരാതിയിലെ പ്രധാന പരാമർശങ്ങൾ.

പരാതി കൊടുത്തിട്ടുണ്ടെന്നും, പാർട്ടി നേതൃത്വം എന്ത് നിലപാട് സ്വീകരിയ്ക്കും എന്ന് അറിയാൻ കാത്തിരിയ്ക്കുകയാണെന്നും ഇന്നലെ പരാതിക്കാരിയായ പഞ്ചായത്തംഗം എം4 മലയാളത്തോട് പ്രതികരിച്ചിരുന്നു.

തന്നെ പരാതിക്കാരി സമൂഹത്തിൽ മോശക്കാരനായി ചിത്രകരിച്ചെന്നും ഇക്കാര്യം പാർട്ടി നേതൃത്വത്തെ ബോദ്ധ്യപ്പെടുത്തുമെന്നുമായിരുന്നു ആരോപണ വിധേയനായ പഞ്ചായത്തംഗത്തിന്റെ പ്രതികരണം.എന്തായാലും ഇന്നലെ ഇരുവരുമായി ഡിസിസി പ്രസിഡന്റ് മുഖഹമ്മദ് ഷിയാസ് ചർച്ച നടത്തിയെന്നും, ഇലയ്ക്കും മുള്ളിനും കേടില്ലാതെ പ്രശ്‌നം പരിഹരിച്ചെന്നുമാണ് ഇപ്പോൾ പരക്കെ പ്രചരിയ്ക്കുന്ന വിവരം.

ഇക്കാര്യം ആരോപണ വിധേയനായ പഞ്ചായത്തംഗം എം 4 മലയാളത്തോട് സ്ഥിരീകരിച്ചു.ഏതാണ്ട് ഇത്തരത്തിലുള്ള പ്രതികരണമാണ് പരാതിക്കാരിയും പങ്കുവച്ചത്.ഡിസിസി പ്രസിഡന്റുമായുള്ള കൂടിക്കാഴ്ചയ്ക്ക് ശേഷം തന്നെക്കുറിച്ച് ചിലർ തന്നെക്കുറിച്ച് തെറ്റായ വിവരങ്ങൾ സാമൂഹിക മാധ്യങ്ങൾ വഴി പ്രചരിപ്പിയ്്ക്കുന്നുണ്ടെന്നും ഇതിനെതിരെ നിയമ നടപകളെക്കുറിച്ച് ആലോചിയ്ക്കുന്നുണ്ടെന്നും പരാതിക്കാരി എം4 മലയാളത്തോട് വ്യക്തമാക്കി.

വനിത പഞ്ചായത്തംഗത്തിന്റെ പരാതി സിബിയെ പുറത്താക്കിയതിന് പിന്നാലെയാണ് പുറത്തുവന്നതെന്നും ഇതിന് പിന്നിൽ സിബിയെ അനുകൂലിയ്ക്കുന്നവരാണ് എന്നും മറ്റു മുള്ള പ്രചാരണം ശക്തിപ്പെട്ടിട്ടുണ്ട്.

വനിത പഞ്ചായത്തംഗം ഡിസിസി പ്രസിഡന്റിന് അയച്ച പരാതി സാമൂഹിക മാധ്യമങ്ങൾ വഴി പ്രചരിപ്പിച്ചെന്നും, പരാതിയിലെ ആരോപണ വിധേയനായ പഞ്ചായത്തംഗത്തെ പൊതുസമൂഹത്തിൽ മോശക്കാരനാക്കുകയായിരുന്നു പ്രചാരണത്തിന് ചുക്കാൻപിടച്ചവരുടെ ലക്ഷ്യമെന്നും മറ്റുമുള്ള ചർച്ചകളും പാർട്ടി പ്രദേശിക തലം മുതൽ സജീവമായിട്ടുണ്ട്.

എന്തായാലും ഈ രണ്ട് സംഭവങ്ങളും പാർട്ടിക്ക് മേഖലയിൽ വലിയ നാണക്കേട് സൃഷ്ടിച്ചിട്ടുണ്ടെന്നാണ് സാധാരണ പ്രവർത്തകരുടെ വിലയിരുത്തൽ.