കോതമംഗലം: സെന്റ് അഗസ്റ്റിൻസ് ഗേൾസ് ഹയർസെക്കൻഡറി സ്കൂളിൽ, ഈ അധ്യയനവർഷം വിവിധ രംഗങ്ങളിൽ മികവ് പുലർത്തിയ പ്രതിഭകളെ ആദരിക്കുന്ന ചടങ്ങ് ആന്റണി ജോൺ എംഎൽഎ ഉദ്ഘാടനം ചെയ്തു.

പിടിഎ പ്രസിഡണ്ട് സോണി മാത്യു അധ്യക്ഷത വഹിച്ച ചടങ്ങിൽ മുനിസിപ്പൽ ചെയർമാൻ കെ കെ ടോമി, വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ അഡ്വക്കേറ്റ് ജോസ് വർഗീസ്, ആരോഗ്യകാര്യ സ്റ്റാൻഡിങ് കമ്മിറ്റി ചെയർമാനും വാർഡ് കൗൺസിലറുമായ കെ.വി തോമസ്, എം പി ടി എ പ്രസിഡണ്ട് ജിപ്സി അലക്സ്, പിടിഎ എക്സിക്യൂട്ടീവ് മെമ്പർ ജിജു തോമസ് എന്നിവർ പ്രതിഭകൾക്ക് ആശംസകൾ നേർന്നു.

സ്കൂൾ ഹെഡ് മിസ്ട്രസ് സിസ്റ്റർ റിനി മരിയ സ്വാഗതം അർപ്പിക്കുകയും, സ്കൂൾ ലീഡർ കുമാരി ദേവനന്ദ സുരേഷ് കൃതജ്ഞത അർപ്പിക്കുകയും ചെയ്തു.

സംസ്ഥാനതലത്തിൽ കല,ശാസ്ത്രം, സ്പോർട്സ് എന്നിവയിൽ മികവ് പുലർത്തിയ പ്രതിഭകൾക്കും, എൻ എം എം എസ്, യുഎസ്എസ് വിജയികൾക്കും രാജ്യപുരസ്കാർ ഗൈഡ്സിനും ഒരുക്കിയ വർണ്ണശബളമായ അനുമോദന ചടങ്ങിൽ, പ്രതിഭകളെ, ബാൻഡ് മേള ത്തോടെ വേദിയിലേക്ക് ആനയിക്കുകയും, മെമെന്റോകളും സർട്ടിഫിക്കറ്റുകളും നൽകി എംഎൽഎ അനുമോദിക്കുകയും ചെയ്തു.

ഇവരെ കൂടാതെ, സബ്ജില്ലാ മത്സരങ്ങളിൽ ഒന്നാം സ്ഥാനം കരസ്ഥമാക്കിയ 222 പ്രതിഭകൾ, രണ്ടും മൂന്നും സ്ഥാനങ്ങൾ നേടിയ 90 വിദ്യാർത്ഥിനികൾ, ലിറ്റിൽ കൈറ്റ്സ് , റെഡ് ക്രോസ് വിജയികളായ 96 കുട്ടികൾ, കെസിഎസിൽ വിജയികളായ 16 വിദ്യാർത്ഥിനികൾ ഉൾപ്പെടെ 492 കുട്ടികളെയാണ് പ്രതിഭാ ദിനത്തിൽ ആദരിച്ചത്.

മൂവാറ്റുപുഴ: കച്ചേരിത്താഴം ബസ് കാത്തിരിപ്പ് കേന്ദ്രത്തിന് സമീപം ഗുരുവായൂര്‍ തീര്‍ത്ഥാടകര്‍ സഞ്ചരിച്ച ടൂറിസ്റ്റ് ബസ് നിയന്ത്രണം നഷ്ടപ്പെട്ട് ഡിവൈഡറില്‍ ഉള്ള മരത്തില്‍ ഇടിച്ച് അപകടം.

തിങ്കളാഴ്ച പുലര്‍ച്ചെ 3.30ഓടെ നെയ്യാറ്റിന്‍കരയില്‍ നിന്നും ഗുരുവായൂരിലേക്ക് പോവുകയായിരന്ന തീര്‍ത്ഥാടകര്‍ സഞ്ചരിച്ച ബസാണ് അപകടത്തില്‍പെട്ടത്. നിയന്ത്രണം നഷ്ടപ്പെട്ട ബസ് കച്ചേരിത്താഴത്തെ റോഡരികിലെ ഡിവൈഡറിലും, തുടര്‍ന്ന് ഡിവൈറിലുള്ള തണല്‍ മരത്തിലും ഇടിക്കുകയായിരുന്നു.

45ഓളം തീര്‍ത്ഥാടകരാണ് വാഹനത്തിലുണ്ടായിരുന്നത്. അപകടത്തില്‍ ആര്‍ക്കും പരിക്കുകളില്ല.ബസിന്റെ മുന്‍ഭാഗം അപകടത്തില്‍ ഭാഗികമായി തകര്‍ന്നു. മൂവാറ്റുപുഴ പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു.

കോതമംഗലം;കരം അടച്ചു വരുന്ന രേഖകൾ കുട്ടമ്പുഴ പഞ്ചായത്ത് രജിസ്റ്ററിൽ ഉണ്ടായിട്ടും സഞ്ചയ സോഫ്റ്റ് വെയറിൽ കടമുറികളുടെ വിവരങ്ങൾ ലഭ്യമല്ലെന്ന്‌ കാട്ടി കരം സ്വികരിക്കാൻ തയാറായില്ല.അദാലത്തിൽ നടപടി സ്വീകരിച്ച് വ്യവസായ വകുപ്പ് മന്ത്രിക്ക് പി.രാജീവ്.

കുട്ടമ്പുഴ പഞ്ചായത്തിലെ വലിയ കരോട്ടിൽ സഹോദരങ്ങളായ സണ്ണി ദാനിയേലിൻ്റെയും ബെന്നി ദാനിയേലിൻ്റെയും അഞ്ച് കടമുറികളുടെ നമ്പറുകൾ സഞ്ചയ സോഫ്റ്റ് വെയറിൽ ലഭ്യമല്ലെന്ന് കാട്ടി 2017 മുതൽ അധികൃതർ ഇവരിൽ നിന്നും കരം സ്വികരിക്കാതിരുന്നതോടെയാണ് ഇരുവരും കോതമംഗലത്ത് സംഘടിപ്പിച്ച അദാലത്തിൽ പരാതി നൽകിയത്.

അദാലത്തിൽ മുൻകൂറായി നൽകിയ പരാതി പരിശോധിച്ച മന്ത്രി പി.രാജീവ് 1963 മുതൽ കരം അടച്ചു വരുന്ന രേഖകൾ കുട്ടമ്പുഴ പഞ്ചായത്ത് രജിസ്റ്ററിൽ ഉണ്ടായിട്ടും സോഫ്റ്റ് വെയറിലെ പ്രശ്നം മൂലം തുടർന്ന് വാങ്ങാതിരിക്കുന്നത് ന്യായമല്ലെന്ന് കണ്ടെത്തുകയും,കോടതികൾ കെട്ടിടത്തിൻ്റെ കാര്യത്തിൽ പ്രത്യേക നിർദ്ദേശങ്ങൾ നൽകിയിട്ടില്ലെങ്കിൽ തുടർന്ന് കരം സ്വീകരിക്കാൻ നിർദ്ദേശിക്കുകയുമായിരുന്നു.

കൂടാതെ സോഫ്റ്റ്‌വെയറിൽ ഉചിതമായ മാറ്റം വരുത്താൻ മന്ത്രി എൽ എസ് ജി ഡി ജോയിൻ്റ് ഡയറക്ടറെ ചുമതലപ്പെടുത്തി. അപേക്ഷ ലഭിക്കുന്നതിനനുസരിച്ച് കടമുറികളും വീടും ഉൾപ്പെടുന്ന അഞ്ച് സെൻ്റ് ഭൂമിയ്ക്ക് പട്ടയം നൽകുന്നതിനുള്ള നടപടി റവന്യൂ ഡെപ്യൂട്ടി കളക്ടർ (എൽ.ആർ) സ്വീകരിക്കണമെന്നും മന്ത്രി നിർദ്ദേശിച്ചു.